Terceiro día, peor tempo, choivas torrenciais, vento, claros que nos fan pensar en mellora e volta outra vez...

Ás 10:15 da mañá chegou o camión co quinto contenedor, e ás 15:00 o derradeiro. A colocación foi sinxela ata completar o módulo, que tivemos que recolocalo enteiro para deixalo ben equilibrado nas zapatas. Roi e David adicáronse a atornillar por dentro os containers un co outro mentres o resto puxabamos para axudar.
Este segundo módulo non quedou tan ben como o primeiro, de feito pensamos que igual non esta nivelado, pero é un problema menor que xa abordaremos.
Tamén seguimos montando a estrutura metálica, pero enriba dos containers.
Durante o día de onte recibimos bastantes visitas de profesores de Belas artes, curiosos fotógrafos, outros colectivos como abendotä, algúns alumnos que non puideron vir antes.
Non puidemos facer a mesa redonda programada no centro cultural de Valadares pero falamos con Carlos(o que cedeu a leira) que traballa alí e chegamos á conclusión de que máis adiante será mellor facer unha rolda de prensa aló máis algunha actividade de presentación do LAB.

Pola noitiña empezamos a preparar a festa, xa que moita xente non poderá quedar hoxe para o brindis, David de Straddle3 (Dj Latiner) non dubidou en traer os platos dende Barcelona con todos os seus discos, e deleitounos cunha sesión electrónica que nos fixo aguantar o frío no baixo de Alto Piñeiro.
Aderezamos a festa cunha queimada e limos o conxuro entre os alg-as sorteando goteiras e acordándonos moito daquela ocupación simbólica tan importante para hoxe estar aquí.

Hoxe, último día deste taller, imos a comer un cocido e xa pola tarde facer o que nos de tempo, mañá polo tanto colgarei a última crónica e subirei os vídeos.

Apertas.