Acabamos de colgar no servidor de alg-a a antiga páxina web do colectivo Flexo. Podedes acceder a ela en:

flexo.alg-a.org

Flexo foi un colectivo de performances e Asociación Cultural á que algún dos membros alg-a pertencimos hai xa algún tempo.
Ordenando un disco duro vello que tiñamos por casa atopamos a páxina web do colectivo, que estaba inactiva dende hai tempo, polo que pensamos que igual estaba ben sacala agora, xa que apenas hai información accesible sobre Flexo. A páxina está subida ó servidor co deseño orixinal da mesma, simplemente se lle engadiu un reproductor de video que ten unha maior compatibilidade. Decidimos facelo así, para que servise de testimonio do paso do tempo.

Flexo foi un colectivo que naceu no ano 1999, formado por unha corrente continua de persoas que fixo que fora pasando por diversas etapas. Aínda así sempre se rexía por unha máxima, que era a creación colectiva e a negación do individuo como autor, en pro dun creador colectivo.

Flexo facía accións, instalacións e promovía eventos. Así por exemplo, construíu un altofalante xigante que soaba, e que o atravesaba cuns taladros ata que o silenciaba. Creou uns seres chamados fonomens que buscaban o acople sonoro e físico entre eles, atou duas casas enteiras entre elas, fixo unha orquesta de altofalantes preparados, etc... Tamén foi parte da organización do festival IFI durante os anos 2002, 2003 e 2004 xunto coa delegación de alumnos da Facultade de Belas Artes de Pontevedra e o colectivo SINSALaudio e co-organizou xunto co clube vademecwn sonotone e membrana, dous encontros de arte sonora que tiveron lugar no clube Vademecwn no 2001.